Kryetari i Partisë Demokratike, Lulzim Basha përsëriti edhe një herë thirrjen për qeverinë që të veprojë sa më parë dhe të mbyllë fasoneritë dhe call center, në mënyrë që të parandalohet përhapja e koronavirusit.
Në një reagim për “Vizion Plus”, Basha deklaroi se masat e qeverisë janë për t’u përshëndetur, por shtoi se duhet të vijohet më tej. Sipas kreut demokrat, pjesa më e madhe e popullsisë nuk ka mundësi të sigurojë nevojat e përditshme bazike, siç mund të jenë ushqimi apo trajtimi i shtresave në nevojë. “Prej ditës së parë kemi kërkuar marrjen e masave sa më të shpejta dhe sa më të forta. Ndaj përshëndes çdo masë që shkon në forcimin e regjimit të distancimit social. Janë shumica prej tyre masa që i kemi kërkuar prej kohësh. Kjo pjesë e punës duhet intensifikuar. Duhet të merren në kohë këto masa. Ajo që mungon është mbyllja e vatrave potenciale të infeksionit, si fasoneritë, call center, fabrikat. Gjej rastin të përsëris thirrjen time të përditshme sepse çdo vonesë në këtë drejtim do të na kushtojë jetë dhe shëndetin e njerëzve. Masat mbështetëse janë shumë mbrapa. Një pjesë e madhe e popullsisë nuk kanë mundësi të sigurojnë të përditshmen, ushqimin apo trajtimin minimal edhe për të moshuarit dhe për shtresat në nevojë”, u shpreh Basha.
Sipas kryedemokratit, nga ana tjetër, qeveria nuk po bën mjaftueshëm për të marrë masa për krizën ekonomike. Ai u shpreh se vendi ynë ka shumë mundësi ekonomike për të ndihmuar shtresat në nevojë dhe të moshuarit. Sipas Bashës, qeveria ka pranuar një pjesë të propozimeve të PD, por ende nuk kanë gjetur zbatim. “Qeveria është shumë vonë me marrjen e masave për të përballuar krizën ekonomike. Ne kemi më shumë se 2 javë që kemi propozuar paketën tonë. Disa propozime janë pranuar, por nuk po zbatohen. Akoma nuk e dimë nëse njerëzit që janë mbyllur në shtëpi do të kenë të garantur minimumin jetik. Shqipëria ka mundësinë të bëjë 3 herë më shumë se çfarë ka bërë deri tani”, u shpreh kreu demokrat Lulzim Basha.