Altin Bojni, drejtor i Filialit të Postës Mat, filial që mbulon edhe degët Dibër, Bulqizë e Klos ka nisur që dje punën për shpëndarjen e pensioneve për 21.617 pensionistë. Postierët po trokasin në çdo banesë të pensionistëve në qytetet Burrel, Klos, Bulqizë e Peshkopi. Brenda dy ditëve janë shpërndarë afro 3894 pensione.
Bojni tha se jemi të vendosur t’u shërbejmë 8081 pensionistëve në Dibër, 5342 në Bulqizë, 5807 në Mat dhe 2387 pensionistëve në bashkinë e Klosit.
Para nisjes së punës postierët janë pajisur nga Posta Shqiptare me mjete mbrojtëse, doreza, maska e dezinfektantë. Po ashtu ata janë porositur t’u thonë të moshuarve të qëndrojnë në shtëpi sepse çdo shërbim do t’u afrohet nga bashkitë, posta dhe strukturat e tjera në shtëpi. Postierët po punojnë me orar të zgjatur, nga ora 08.00-18.00.
“Kemi marrë shumë falenderime nga pensionistët e Dibrës, Matit e Bulqizës, thotë Bojni. Postierët po punojnë me përkushtim dhe korrektësi maksimale. E kemi nisur punën nga qytetet për të vijuar në çdo fshat të Qarkut Dibër. Deri tani nuk kemi patur asnjë ankesë. Postierët i kemi porositur të mbajnë distancë dhe të kenë me vete në çdo moment mjetet mbrojtëse, pra të mbrohen nga infektimi i mundshëm nga Covid 19.”
I pyetur nga Tirananews.al në lidhje me akuzat e ish deputetit të PD-së Xhemal Gjunkshi drejtori i Filalit Mat tha se asgjë nuk është e vërtetë dhe se nuk merret me ish deputetët që nxijnë gjithçka në këto ditë të vështira.
