Ish-deputeti i PD-së, Bardh Spahia tha sot se numri i ulët i testimeve fsheh realitetin e përhapjes së virusit.
Në një deklaratë për mediet, Spahia tha sot po bëhet një muaj që kur në Shqipëri u zbulua rasti i parë me COVID-19.
“Ky muaj i vështirë ka provuar në mënyrë të përsëritur se qeveria ishte e papërgatitur për të përballuar krizën e krijuar nga koronavirusi. Shqipëria kishte pak kite për të testuar sa më shumë të dyshuar, sepse qeveria veproi me shumë vonesë për t’i siguruar, pavarësisht thirrjeve tona të hershme. Në përpjekje për të mbuluar dështimin në furnizimin e mjaftueshëm me kite për teste, Rama e mbajti sekret sasinë e tyre dhe, kur u detyrua të fliste, ai gënjeu”, tha ai.
Bardhi shton se “deklarata e tij se ne jemi të gatshëm të bëjmë 2 mijë teste në ditë, u përgënjeshtrua nga Ministrja e Shëndetësisë dhe nga vetë Komiteti i Ekspertëve të Edi Ramës”.