Me anë të një letre, drejtuar ministres së Shëndetësisë, Ogerta Manastiliu, Haxhia shprehet se të dëmtuar ekonomikisht nga kjo situatë e krijuar nga COVID-19 janë edhe avokatët për shkak se janë mbyllur gjykatat, e për pasojë edhe ato duhet të përfitojnë ndihmë ekonomike.
“Në urdhrin tuaj për lejimin apo ndalimin e ushtrimit të veprimtarisë së biznesit nuk cilësohet kategoria e avokatëve. Ne mendojmë se në këtë betejë të madhe, ku është përfshirë i gjithë populli ynë, edhe avokatët janë pjesë e pasojave financiare që kanë lindur si për çdo biznes. Referuar vendimit të KLGJ, me anë të cilit pezullohen të gjitha proceset gjyqësore me përjashtimet e përcaktuara në të (masat e sigurimit), faktikisht gjykatat dhe prokuroritë rezultojnë pa veprimtari. Sikurse dihet që veprimtaria e avokatëve është tërësisht e lidhur me gjykatat dhe prokuroritë, de facto është pezulluar edhe veprimtaria e avokatëve”, shkruhet në letrën që mban datën 30 mars.
Të gjitha proceset gjyqësore do të jenë të pezulluara deri më 7 prill, për shkak të situatës së krijuar nga COVID- 19, për rrjedhojë, Haxhia në emër të avokatëve kërkon që të jenë edhe ato pjesë e vendimit të Këshillit të Ministrave (VKM) ku përcaktohen kategoritë përfituese të ndihmës financiare.
