E marta ishte një ditë me ulje temperaturash e me shi e shtrëngata, dhe mëngjesi i kësaj të mërkure nisi i vrenjtur e me erë të fortë në Tiranë.
Megjithatë sipas Shërbimit Meteorologjik Shqiptar kështu do jetë vetëm pjesa e parë e ditës, pasi moti më pas do të jetë i kthjellët në të gjithë territorin.
PARASHIKIMI NGA SHMU
Duke përjashtuar orët e para të mëngjesit të cilat do të jenë me vranësira mesatare deri të dendura dhe reshje shiu të herëpashershme me intensitet të ulët (deri në orën 08:00) më pas moti do të jetë i kthjellët në të gjithë territorin.
Por duhet theksuar se pritet të jetë një ditë e freskët (krahasuar me temperaturat e ditëve të fundit) pasi parashikohet një rënie e temperaturave në të dyja vlerat.
Temperaturat e mëngjesit parashikohen nga 1°C në relievet malore deri në 10°C në ato të ulta e bregdetare. Në vlerat e mesditës temperaturat parashikohen jo më shumë se 10°C në relievet malore deri në 21°C në ato të ulta dhe ato bregdetare.
Gjithashtu duhet thënë se pritët që të ketë erë intensive me drejtim nga kuadrati i veriut dhe shpejtësi mesatare 5-15m/s. Por përgjatë vijës bregdetare dhe zonat luginore era fiton shpejtësi dhe bëhet intensive me shpejtësi hera herës deri në 25-30m/s.
Qëndroni të lidhur me SH.M.U për përditësime të herëpashershme.