15 ciganë kanë udhëtuar afro 130 kilometra pa ju hyrë gjemb në këmbë. Me tri makina dhe me më shumë se 10 kafshë ngarkese kanë udhëtuar nga Fushë Kruja në Rrëshen dhe pastaj drejt Komsisë e Macukullit.
“Turistët” e pazakontë, pikërisht në këtë situatë pandemie sapo janë ngjitur në fshatin Macukull të Matit janë urdhëruar nga autoritetet e Bashkisë Mat të kthehen nga kanë ardhur.
Administratori i Macukullit, Ervin Bukaçi sqaroi se mëngjesin e sotëm “mysafirët” janë ndodhur në qendër të fshatit, por ai u ka kërkuar të mos instalohen aty. Madje Bukaçi ka njoftuar Komisariatin e Policisë Burrel dhe adminitratoren e njësisë fqinje, që edhe ajo të mos lejonte zbarkimin e tyre në fshat.
“Rreth orës 14.00 erdhën edhe në fshatin Derjan të paktën 15 ciganë, kishin me vete tri makina dhe më shumë se 10 mushka, kuaj e gomerë, shprehet administratorja Fatma Doku. Jam lodhur shumë për t’i bindur se në fshat nuk mund të qëndronin. Ata vinin nga një zonë shumë e infektuar dhe nuk mund t’i lejoja të qëndronin”.
Ndërsa në mbrëmje ciganët kanë mbërritur në zonën e Lisit. Aty janë përballur me administratorin Klodian Milkurti. Edhe ky u ka kërkuar të vijojnë rrugën, por për afro një orë ata kanë tentuar të ngrenë çadrat dhe ta kalojnë natën në Burgajet. Milkurti është porositur nga drejtuesit e Bashkisë Mat të kërkojë dhe ndihmën e Policisë dhe të mos i lejojë “turistët” nga Fushë Kruja të qëndrojnë në fshat.
Ciganët u kanë treguar autoriteteve lokale një dokument që pretendonin se e kishin shkarkuar nga portali e-albania, por në të vërtetë shkresa e tyre nuk kishte vulë, pra ishte thjeshtë një letër e shkruar nga ata. /tirananews.al/
