Kuvendi i Shqipërisë në seancën e fundit plenare votoi faljen e gjobave për këmbësorët dhe drejtuesit e automjeteve që shkelën karantinën dhe gjithashtu kthimin e patentave të marra gjatë kësaj periudhe, për ti hapur rrugë veprimit sipas kodit penal të ndryshuar posaçërisht për situatën e krijuar nga Covid-19. Ky vendim i qeverisë mori 95 vota pro, 6 kundër, 3 abstenim. Por cilët ishin ligjvënësit të cilët votuan kundër këtij faljes së gjobave për shumë qytetarë? Disa prej tyre kundërshtuan hapur edhe në seancë gjatë fjalimeve të tyre.
Bëhet fjalë për deputeten e opozitës Fatjona Dhimitri e cila votoi kundër, pasi sipas saj, kryeministri njëherë i tmerron qytetarët pastaj i “përkëdhel”. Për Dhimitrin, i gjithë ky proces është çoroditës. Kundër këtij vendimi është shprehur edhe deputeti Ralf Gjoni. Edhe deputetët Halit Valteri dhe Edlira Hyseni kanë votuar kundër këtij vendimi të qeverisë. Falja e masave administrative nënkupton kthimin e shumës së detyrimit të falur e cila do kalohet në mënyrë automatike në llogarinë bankare të individit.