Shkencëtarët në Mbretërinë e Bashkuar po zhvillojnë një ilaç të ri për të trajtuar pacientët me COVID-19. Testimet po kryhen në Spitalin Universitar të Southampton.
Medikamenti është krijuar nga kompania “Synairgen”, dhe përdor një proteinë të quajtur “interferon beta”, të cilën e prodhon trupi ynë kur preket nga një infeksion viral.
Rezultatet paraprake të këtij testi priten të dalin deri në fund të qershorit. Studiuesit shpjegojnë se koronavirusi i ri frenon prodhimin e proteinës interferon beta si pjesë e strategjisë për të pushtuar sistemin tonë imunitar.
Medikamenti i ri synon të rrisë praninë e kësaj proteine në trupin e njeriut, për të nxitur një kundërpërgjigje më të fortë anti-virale tek pacientët. Aktualisht nuk ka asnjë ilaç të konfirmuar që mund të luftojë koronavirusin e ri, ndërsa doktorët po mbështeten kryesisht tek sistemi imunitar i pacientëve.