Kryeministri në detyrë, Albin Kurti deklaroi në një konferencë shtypi se vendimi për hapjen graduale të kufirit me shtetin e Shqipërisë do të jetë shkencore dhe jo politike.
I pyetur për deklaratat e kryeministrit të Shqipërisë, Edi Rama, se nuk e di me kë të bisedojë në Kosovë për të filluar hapjen graduale të kufirit, shefi i ekzekutivit tha se ai është kryeministër në detyrë dhe nuk ka dilema për këtë se kush e përfaqëson Kosovën.
“Nuk e kam parë se ç’ka thënë kryeministri shqiptar në emisionin ku ishte i ftuar, por ne jemi të interesuar se porsa të krijohen kushtet e duhura ta bëjmë këtë hapje të kufirit, veçse ta dini që vendimet tona nuk janë politike, nuk janë demokratike sa janë shkencore, sepse bazohen në rekomandimet e Institutit Kombëtar të Shëndetësisë Publike. Unë jam kryeministër në detyrë, unë nuk kam dilema për këtë gjë, kush ka dilema duhet të pyeten ata. Dje kam takuar ambasadorin e Republikës së Shqipërisë, ku kemi biseduar për shumë gjëra, ndër të cilat edhe hapja e kufirit”, tha Kurti.