“Neverland Ranch”, shtëpia luksoze e yllit të popit Majkëll Xhekson, është nxjerrë në shitje për 100 milionë dollarë. Nga jashtë, ajo duket si shtëpia e ëndrrave. Por për dhjetëra fëmijë, ka qenë shtëpia e tmerreve. Një dokumentar i fundit, ka sjellë dëshmi shokuese të abuzimeve seksuale të këngëtarit me fëmijët e mitur, të cilët ai i ftonte në shtëpinë e tij si miq. Filmi fokusohet në dëshmitë e Ëade Robson dhe James Safechuck, të cilët pohojnë se janë abuzuar nga Xhekson kur ishin përkatësisht 14 dhe 7 vjeç. Sipas tyre, Xhekson u falte shpesh bizhu të shtrenjta, që të mos tregonin. Sa ishte gjallë, Majkëll i hodhi poshtë akuza të tilla. Në vitin 2005, ai u lirua nga një gjykatë nga 10 akuza të tilla. Por mediat amerikane kanë risjellë në vëmendje një intervistë të motrës së tij më të madhe Lajota, e cila deklaron se e ëma e tyre, Kethrin Xhekson, dyshonte për prirjet pedofilike të Majkëllit që në vitin 1984, kur këngëtari nisi të sillte në shtëpi fëmijë të mitur, pa pasur ndonjë lidhje familjare me ta.
Por ajo heshti, dhe nuk është e vështirë të kuptohet pse. Ishte përfituesja kryesore e pasurisë që la pas Majkëll, mbi 1 miliardë dollarë. Gati e gjithë familja heshti për të mbrojtur imazhin e një ikone të muzikës botërore. Ata mbrojtën gjenialitetin e tij si artist, por edhe përbindëshin që fshihej tek ai.