Mati është futur sërisht në zonat e prekura nga Covid-19. Aktualisht janë shfaqur 6 raste të reja në Njësinë Administrative Rukaj në Bashkinë e Matit. Burime pranë NjKVSH Mat thanë këta persona janë kontakt i të moshuarës që ndodhej në spital në Tiranë e cila rezultoi pozitive 2 ditë më parë.
Nisur nga kjo, janë marrë ditën e djeshme 10 tampon për analiza nga të cilat 6 kanë rezultuar pozitive. Të gjitha rastet janë pa shenja klinike dhe kanë marrë udhëzimet e nevojshme nga personeli shëndetësor.
Mësohet se vajza e të moshuarës që ishte shtruar në QSUT është infektuar teksa i shërbente nënës së saj. Ajo para pak ditësh është rikthyer në fshatin Urakë, te familja e bashkëshortit. Pardje, kur e moshuara rezultoi pozitive, janë vënë në lëvizje autoritetet vendore të shëndetësisë. Po hetohet sakaq në se pjestarë të familjes së prekur kanë kontakte me persona të tjerë, në Urakë apo në Burrel. Rstet e fundit kanë krijuar frikë dhe panik te qytetarët matjanë.
Po ashtu, vazhdon hetimi epidemiologjik duke gjurmuar kontaktet e dy familjeve që janë infektuar me Covid-19. Ndërkohë që kujtojmë se veç Tiranës, raste të reja raportohen dhe në Sarandë e Lushnje, duke e skuqur sërish hartën e vendit.