Këshilli Bashkiak i qytetit të Durrësit në një mbledhje të jashtëzakonshme dha dritën jeshile për shpalljen e gjendjes së emergjencës mjedisore përsa i përket menaxhimit të integruar të mbetjeve në territorin e bashkisë.
Për këtë vendim shkak ka qenë mbyllja e vend-depozitimit të Porto-Romanos. Rrugët e Durrësit janë të tejmbushura me mbeturina urbane prej gati një jave dhe ajri është ndotur nga era e rëndë e plehrave, për shkak të mbylljes së sheshit të depozitimit të mbetjeve në Porto Romano, të cilin qeveria shqiptare synon ta transformojë në një park urban ekologjik falë një investimi prej 15 milionë eurosh.