Deputetët e opozitës parlamentare këmbëngulin që të ndryshohet Kushtetuta dhe të hapen listat për deputetë.
Myslim Murrizi tha pak momente më parë, se 29 deputetë të opozitës kanë firmosur për ndryshimin e neneve të Kushtetutës për sistemin zgjedhor.
“Kërkesa jonë janë listat e hapura. 29 deputetë të pranishëm kanë firmosur. Edhe deputetë të tjerë kanë firmosur si Ralf Gjoni, që nuk është i pranishëm. Që të mos flasim poshtë tavolinave dhe të mos fshihemi bahçe më bahçe.
Ne kërkojmë hapjen e listave. Rishikim të nenit 68 dhe 64 të Kushtetutës dhe më pas të diskutojmë nen pas neni të Kodit Zgjedhor. Ne kemi qëndruar konseguent me atë që kërkon Kushtetuta. Pjesën tjetër hap pas hapi do ta diskutojmë në komisionin e Reformës Zgjedhore dhe gjej rastin që sot të falënderoj edhe Presidentin e Republikës, i cili ka kërkuar që të zbatohen të plota kërkesat e OSBE/ODIHR”, tha Murrizi.
