Kryebashkiaku i Matit Agron Malaj ka reaguar në lidhje me protestat e disa banorëve të fshatrave Zallë Gjoçaj e Gjoçaj në Njësinë Administrative Derjan. Vetëm pak ditë pasi ata kanë humbur betejat ligjore Malaj ka sqaruar se Parku Kombëtar Zallë Gjoçaj nuk preket nga subjekti që po ndërton HEC-in Zajs-Melth.
Kryetari i bashkisë thekson se uji që rrjedh nga Zallë Gjoçaj drejt Liqenit të Ulzës humbet vetëm 2-3 kilometra nga burimi. Në dalje të fshatit Melth uji nuk e vijon rrjedhën e tij, pasi “përpihet” nga honet e zonës.
Malaj tha se burimi kryesor i fshatit Zallë Gjoçaj do të përdoret për ndërtimin e një ujësjellësi që do t’u shërbejë banorëve të 18 fshatrave në NJA Derjan, Macukull, Rukaj si dhe do të shtojë sasinë e ujit në depon qëndrore për konsumatorët e Burrelit.