Qeveria shqiptare parashikon ndryshimin e ligjit për armët dhe draftin e ka hedhur për konsultim publik.
Nisma parashikon se një 22-vjeçar mund të pajiset me autorizim për të mbajtur armë, nga 25 që është mosha minimale me ligjin aktual.
Ndërsa kategoria e armëve që parashikonte armët e zjarrit antike, me hark apo me tojë, armët e ftohta të cilat ndahen në armë prodhim fabrike dhe armë artizanale, nuk do të kenë më nevojë për autorizim nga strukturat e policisë për t’i pasur në përdorim.
Krahas kësaj, të gjitha autorizimet që do të jepen nga strukturat e policisë do të jenë më një afat 5-vjeçar dhe do të ripërtërihen pas skadimit të këtij afati përpara një komisionit.
Armët e zjarrit që konsiderohen si prova materiale të konfiskuara nga organet ligjzbatuese do të kalojnë në pronësi të Ministrisë së Mbrojtjes, e cila do të ketë edhe kompetencës që t’i shesë për skrap.
Për sa i përket llojeve të autorizimeve, një i tillë do të duhet edhe për veprimtari kinematografike apo muzikore, ku personat duhet të marrin autorizim për të përdorur këto lloje armësh në xhirimet e tyre.
Draft-ligji ka parashikuar edhe armët e gjahut. Një gjahtar do të mund të pajiset vetëm me një autorizim për armët e gjahut ose në disa të tjera nëse ai paguan 10-fishin e tarifës që do të përcaktojnë organet shtetërore.