Juventusi do t’i ofrojë Real Madridit 45 milionë euro për Marcelon dhe lojtarit kontratë me vlerë 12 milionë euro në vit. Cristiano Ronaldo është duke bërë të pamundur që gjatë verës ta bindë Marcelon t’i bashkohet atij te Juventusi, raporton Tuttosport. Madje, tashmë sipas Tuttosport, Juve ka bërë gati ofertën për brazilianin, plot 45 milionë euro do të derdhen në arkat e Real Madridit, teksa Marcelo do të fitojë 12 milionë euro në sezon, ofertë marramendëse kjo për një lojtar që në maj mbush 31 vjet.
Është mësuar gjithashtu se Juve do t’i sigurojë këto para nga shitja e Alex Sandros, për të cilin interesohen klube nga Premierliga si Manchester United, Manchester City apo edhe Chelsea. Marcelo është pjesë e Madridit që nga janari i vitit 2007 dhe kontrata aktuale i skadon në vitin 2022. Deri më tani këtë sezon, Marcelo ka shënuar tre gola dhe ka dhuruar katër asistime në 22 ndeshje për Los Blancos.