Presidenti i Kosovës, Hashim Thaçi është kthyer sot në Kosovë.
Këtë e ka bërë të ditur përmes një fotografie të cilën e ka postuar në llogarinë e tij në Facebook. Ai shfaqet krah dy prindërve të tij, si për të dhënë mesazhin se mbështetja e tyre është gjëja më e rëndësishme në betejën që e pret.
Thaçi ka qenë jashtë vendit dhe ka ndërprerë udhëtimin drejt Shteteve të Bashkuara, ku pritej të mbahej takimi në mes të delegacionit të Kosovës dhe Serbisë për rifillimin e dialogut, me ndërmjetësim të ambasadorit Richard Grenell.
Vizita e tij u ndërpre, si pasojë e publikimit të akt-akuzës për të, nga Prokuroria e Gjykatës Speciale në Hagë.
Prokuroria Speciale në Hagë ngriti aktakuzë ndaj Thaçi dhe Veselit, nën dyshimin për vrasjen e afërsisht 100 personave.
Ndërkaq, lidhur me zhvillimet e fundit Thaçi paralajmëroi konferencë për media të dielën, por që është shtyrë për ditën e hënë në orën 20:00.
Kjo u bë e ditur nga Zyra e Presidentit.