Vendimi i gjykatës turke për t’i hequr statusin muze Kishës së Shën Sofisë në Stamboll dhe propozimit për ta kthyer në xhami ka ngjallur shumë reagime, ndër to edhe i Kishës Orthodokse Autoqefale e Shqipërisë.
Me anë të një shënimi në faqen zyrtare në rrjetin sociale ‘facebook’ fillimisht është kryepeshkopi Anastas, i cili thotë:
“Është mëkat edhe gabim kur vaji i fesë përdoret për të ndezur dhe për t’i shërbyer qëllimeve nacionaliste. Qëllimi fisnik i fesë është të qetësojë plagët dhe të paqësojë shpirtrat e njerëzve.”
Ndërkohë më tej reagimi i Kishës Orthodokse Autoqefale e Shqipërisë shprehet:
“Ky vendim bën pjesë në ato veprime tragjike, të cilat minojnë shpresën më të madhe të epokës sonë, që është bashkekzistenca e feve dhe qytetërimeve.
Ky vendim na kthen pas, në aspekte të errëta të historisë. Një vend si Turqia, që dëshiron të jetë pararojë, zgjedh rolin e praparojës së vonuar kulturore.
Është mëkat edhe gabim kur vaji i fesë përdoret për të ndezur dhe për t’i shërbyer qëllimeve nacionaliste. Qëllimi fisnik i fesë është të qetësojë plagët dhe të paqësojë shpirtrat e njerëzve.”