Qeveria gjermane ka propozuar vendeve anëtare të BE-së vendosjen e sanksioneve kundër Rusisë për sulmin e hakerëve në Bundestag pesë vjet më parë.
“Qeveria gjermane supozon se një anëtar i shërbimit të inteligjencës GRU të ushtrisë ruse ishte përfshirë në një sulm të hakerësh në rrjetin informatik të Bundestagut në maj 2015. Kjo është arsyeja pse qeveria ka propozuar sanksione të përbashkëta kundër Moskës tek partnerët e saj të Bashkimit Evropian”, njofton agjencia e lajmeve gjermane DPA.
Gjermania po bën thirrje për vendosjen e sanksioneve, duke përmendur kornizën e Këshillit të Bashkimit Evropian 2017, i cili lejon vendosjen e masave për të parandaluar sulmet në internet.
Një zëdhënës i Bashkimit Evropian tha që vendet anëtare mund të paraqesin propozime për sanksione, të cilat më pas duhet të vendosen unanimisht nga Këshilli i Bashkimit Evropian.
Zyra e Prokurorit të Përgjithshëm në Karlsruhe ngriti një aktakuzë në fillim të majit kundër shtetasit rus Dmitry Badin, nën dyshimet për sulm në rrjetin informatik të Bundestagut si anëtar i një grupi të hakerëve.
Me atë rast, supozohet se një sasi e madhe e të dhënave, kryesisht e-mail nga deputetët, u transferuan në një server jashtë vendit.