Avokati Spartak Ngjela është shprehur sot se Edi Rama nuk mund të fitojë dot një mandat të tretë qeverisës për shkak të reformës anti-korrupsion. Në një intervistë në emisionin “Fokus” në televizionin TVT, Ngjela theksoi se shenjat janë se në Shqipëri do të përzihen ujrat për shkak të reformës në drejtësi dhe shenjat do të dallohen në muajt dhjetor.
“Nuk besoj se mund të fitojë një mandat të tretë dhe kjo për shkak të SPAK. Do kemi eleminime figurash nga reforma anti-korrupsion. Kur të fillojë funksionimi i SPAK-ut, shumë nga këta nuk do i kesh në zgjedhjet e 2021, pasi do të jenë nën akuzë. Por, SPAK po pret Byronë Kombëtare të Hetimit. I gjithë ekipi i kësaj të fundit është duke u trajnuar në Amerikë dhe trajnohet me dosjet, kam të dhëna të plota, e korrupsionit. Cilët janë hetuesit, sipas ligjit shqiptar, ata duhet të jenë edhe me shtetësi shqiptare. Ata kanë dy shtetësi, amerikane dhe shqiptare”, tha ai.
Më tej Ngjela u shpreh se në Shqipëri mund të prodhohen lëvizje të reja politike dhe kjo në radhë të parë falë reformës në drejtësi, e dyta për shkak të përcëptimit të ngjarjeve në funksion të demokracisë dhe së treti falë SPAK dhe listave të hapura.