Avokati Spartak Ngjela shpreh bindjen se ndryshimet kushtetuese do të votohen javën që vjen siç edhe kaloi sot marrëveshja e 5 qershorit e dakordësuar mes PS-së dhe opozitës së bashkuar.
Ngjela tha se: “Situata nuk është ndonjë problem por është frika e PD-së që e krijon këtë situatë. Këta harrojnë që parlamentarizëm do të thotë votë në parlament. PS nuk i ka votat në parlament për të votuar marrëveshjen e 5 qershorit. E plotëson opozita parlamentare, por këta nuk e votojnë nëse nuk u plotësohet kërkesa për ndryshimin e sistemit. PD flet kot, nuk ka numër. Çfarë ju duhet këtyre të PS-së që bëjnë bisedime me këta që kanë ikur nga Parlamenti? Ata kanë abuzuar me votën që ju kanë dhënë përkrahësit. Çfarë arritën duke ikur nga Parlamenti, arritën demokracinë? Jemi përballë kësaj situate. Do bëhet marrëveshja e 5 qershorit, do mbarojë dhe kërkesa që ka opozita parlamentare.”
Në një intervistë për Ora News, Ngjela vlerëson se hapja e listave do të ishte një hap drejt demokracisë ndërsa shton se nuk e prekin sistemin.
Edhe pse Rama përqafoi nismën e opozitës parlamentare për listat e hapura, Ngjela thotë se kryeministri në thelb nuk e do një gjë të tillë por nuk ka një zgjidhje tjetër.
Ngjela shtoi: “Do të ishte një hap përpara drejt demokracisë. Në Shqipëri që nga viti 1991 është bërë vetëm 1 votim i lirë. Atë e ka bërë presidenti komunist ndërsa këta nuk kanë bërë asnjë votim i lirë pasi janë vetëm hajdutë votash. Duhet të kemi parasysh një gjë, pa një pushtet gjyqësor të pavarur nuk ka zgjedhje të lira. Po të ketë pushtet gjyqësor të pavarur të arrestojnë direkt. Ne presim Byronë Kombëtare të Hetimit të zhvillohet. Listat e hapura janë votat e popullit.”