Besimtarët myslimanët në mbarë botën festojnë sot Kurban Bajramin.
Në Shqipëri falja e Bajramit u realizua në disa xhami të vendit dhe jo në shesh, siç ka ndodhur vitet e shkuara.
Për shkak të pandemisë së Covid-19, në koordinim me myftinitë e rretheve u mor vendimi që falja e Kurban Bajramit të mos bëhet në sheshe për të shmangur grumbullimet e mëdha, por nëpër xhami, duke zbatuar të gjitha masat, e sakaq diçka e tillë nuk ka ndodhur.
Nga fotot e mbërritura në redaksinë e Tirananews.al, shihet qartë që protokolli anti-Covid është shkelur.
Pa distancë fizike, pa mbajtur maska dhe të grumbulluar në ambient të mbyllur, besimtarët myslimanë në Berat, Kukës, por edhe xhami të tjera të vendit kanë falur namazin e Kurban Bajramit duke mos respektuar rregullat dhe protokollin sanitar.
RREGULAT QË IU JANË KËRKUAR BESIMTARËVE QË TË RESPEKTOHEN
• Marrja e abdesit të kryhet në shtëpi.
• Të mbahet maska nga çdo besimtar.
• Çdo besimtar duhet të ketë me vete sexhade personale.
• Mbajtja e distancës fizike gjatë faljes.
• Ndalohet përdorimi i abdesthaneve dhe tualeteve.
• Personat me simptoma të sëmundjes nuk lejohen të hyjnë në xhami.
• Hyrja dhe dalja në xhami të mos jetë në grup.
• Të shfrytëzohen materialet dezinfektuese në hyrje të cdo xhamie.
