Pas infektimit me koronavirus i kryeministrit të Kosovës, pozitiv ka rezultuar dhe zv.kryeministri Driton Selmanaj.
Ka qenë vetë zyrtari i lartë që ka dhënë lajmin duke thënë se është izoluar që nga momenti kur bëri testimin.
“Dje e kam bërë testin për covid-19 dhe sot më njoftuan që kam rezultuar pozitiv. Specialistët shëndetësor po më thonë që jam a-simptomatik. Nga momenti i testimit jam izoluar dhe kështu jam i detyruar të qëndroj edhe për dy javët e ardhshme.
Do përpiqem që të gjitha obligimet e punës ti kryej nga shtëpia.”, shkruan Driton Selmanaj ne Facebook.
Të dielën, më 2 gusht, kryeministri i Kosovës, Avdullah Hoti njoftoi se ka dalë pozitiv në testin për COVID-19.
Hoti ka thënë se do të vazhdojë punën nga shtëpia.
Nga 13 marsi deri më 4 gusht, janë regjistruar 9.049 raste me koronavirus. Prej tyre, 256 pacientë kanë vdekur dhe 4,989 janë shëruar./REL