Policia e Mallakastrës bën të ditur se ka sekuestruar një sasi prej 5 kg kanabis dhe disa fidanë të mbjellë në kubikë duke vënë në pranga tre persona, dhe në kërkim babain e njërit prej tyre.
Ata kultivonin fidanë kanabis në tokat e tyre në fshatin Baltëz.
NJOFTIMI I PLOTE
Fier – Mallakastër
Finalizohet me sukses një tjetër operacion antikanabis.
Gjatë operacionit u sekuestruan rreth 5 kg kanabis dhe disa fidanë kanabis të mbjellë në kubikë.
Arrestohen në flagrancë 3 shtetas, shpallet në kërkim 1 tjetër.
Në vijim të punës për parandalimin, evidentimin dhe goditjen e kultivimit të bimëve narkotike, bazuar në informacione të marra në rrugë policore dhe si rezultat i organizimit të shërbimeve për kontrollin e territorit, nga Komisariati i Policisë Fier dhe Komisariati i Policisë Mallakastër, në bashkëpunim me Seksionin për Hetimin e Narkotikëve në DVP Fier, u evidentuan dhe u goditën 3 raste të veprimtarisë kriminale në fushën e narkotikëve.
Si rezultat u arrestuan në flagrancë shtetasit:
•I. L., 45 vjeç, banues në Aranitas, Mallakastër;
•A. T., 54 vjeç, banues në Baltëz, Fier.
•F. L., 17 vjeç, banues në Baltëz, Fier.
U shpall në kërkim dhe po punohet për kapjen e babait të 17-vjeçarit, shtetasit A. L., 52 vjeç.
Arrestimi i këtyre shtetasve u bë pasi janë autorët e dyshuar të kultivimit të fidanëve narkotikë në tokat e tyre në fshatin Baltëz dhe Aranitas.
Gjithashtu, gjatë kontrollit të banesës, shtetasit A. T., iu gjetën dhe sekuestruan rreth 5 kg lëndë narkotike cannabis sativa.
Materialet do t’i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.