Problemet e shumta me financat që Flamurtari ka hasur këtë sezon, i ka detyruar shumë futbollistë që të largohen nga klubi dhe në këtë mënyrë, vlonjatët po përballen me një eksod ndër më të madhin e viteve të fundit. I fundit që është larguar nga klubi vlonjate, është mesfushori Muhamed (Meti) Useini i cili dje ka zyrtarizuar largimin.
Nëpërmjet një postimi në rrjetin social ‘Facebook’, ai i ka dhënë lamtumirën Flamurtarit duke e konsideruar veten me fat që ka qenë pjesë e kësaj skuadre, ndërkohë që i uron edhe suksese për pjesën e mbetur të sezonit e vazhdimin.
“Së pari dëshiroj të them se sa krenar jam që kam qenë pjesë e familjes dhe të luaj për klubin me një histori kaq të madhe. Dëshiroj të iu falënderoj për të gjithë dashurinë, mbështetjen që kam pasur dhe që e kam. Nuk do t’i harroj kurrë disa momente dhe ndeshje speciale. Do të më mungojë Flamurtari F.C dhe Vlora.
Ju uroj shumë suksese në vazhdimësi dhe besoj të shkojë Flamurtari aty ku e ka vendin. Do ngelem tifozi me i zjarrtë i skuadrës me respekt M.U22”, shkruhej në postimin e futbollistit