Ljuis Hemilton nuk njeh rivalë në provat zyrtare të ditës së sotme për Çmimin e Madh të Belgjikës. Në pistën e SPA, britaniku dominoi në çdo aspekt dhe nuk kishte rrugë tjetër veçse të merrte “Pole Position” e radhës. Pas tij për të konfirmuar se Mercedesi është sipër gjithë të tjerëve, u rendit Botas.
Vetëm vendi i tretë për Red Bull-in e Maks Vershtapen, i cili bëri sa mundi për të konkurruar “Shigjetat e Arta”. Sakaq, një dështim total te Ferrari. “Kokëkuqja” e këtij sezoni ka humbur orientimin dhe në provat zyrtare nuk ia doli as të kualifikohej në sesionin final.
Leklerk e mbylli në vendin e 13, ndërsa një pozicion më poshtë u rendit makina e drejtuar nga Sebastian Fetel. Kjo ishte hera e parë nga viti 2006 që dy makinat Ferrari nuk ia dilnin të kualifikoheshin në sesionin final. Statistika këto të cilat nuk japin aspak shpresë as për garën e nesërme.