Partia Demokratike ka reaguar sërish për emërimin e Albert Dervishajt në postin e zv/drejtorit të Përgjithshëm të Policisë së Shtetit, duke thënë se ai ka qenë ish-agjent i Sigurimit të Shtetit.
Në një dalje për mediat nga selia e blu, ish-deputetja Izmira Ulqinaku thotë se Rama dhe Lleshaj shkelën ligjin me këtë emërim, ndaj sipas saj Dervishaj duhet të shkarkohet.
“Heshtja e tyre konfirmon skenarin për kapjen e policisë”, u shpreh Ulqinaku, teksa theksoi se ata duhet të mbajnë përgjegjësi.
“3 ditë pas denoncimit të Partisë Demokratike se në krye të Policisë së Shtetit është emëruar një agjent i sigurimit të shtetit, Edi Rama dhe Sandër Lleshaj vazhdojnë të heshtin.
Asnjë fjalë nga Edi Rama, asnjë fjalë nga Sandër Lleshaj, dy njerëzit që kanë emëruar bashkëpunëtorin e sigurimit, në postin e nëndrejtorit të policisë.
Kryeministri në ikje dhe shërbëtori i tij, Lleshaj, heshtin, sepse janë ata përgjegjës për emërimet e të inkriminuarve dhe bashkëpunëtorëve të Sigurimit në drejtim të Policisë.
Albert Dervishaj është emëruar si numri 2 i Policisë së Shtetit në shkelje të ligjit që e ndalon përfshirjen në polici të bashkëpunëtorëve të Sigurimit të Shtetit.
Emëruesit e tij në krye të Policisë së Shtetit, heshtin sepse ata e dinë ekzistencën e dosjes me numër regjistri 7559 në degën e sigurimit në Korçë në emrin e Albert Dervishajt”, deklaroi Ulqinaku.
Sipas saj, Albert Dervishaj është bashkëpunëtor i Sigurimit të Shtetit në periudhën e diktaturës dhe ka bashkëpunuar me Sigurimin e Shtetit për 10 vite.
“Sipas të dhënave, Albert Dervishaj, është rekrutuar nga Sigurimi në datën 24.08.1981 me numër regjistri 7559. Punëtori operativ që e ka tërhequr në bashkëpunim ka qenë Ali Anadolli dhe është mbajtur në bashkëpunim nga punonjësi operativ Qirjako Prifti.
Albert Dervishaj duhet të shkarkohet menjëherë nga detyra dhe ata që e kanë emëruar në krye të policisë, Edi Rama dhe Sandër Lleshaj, duhet të mbajnë përgjegjësi ligjore.
Në qeverisjen e Partisë Demokratike, të gjithë ata që kanë shkelur ligjin do mbajnë përgjegjësi ligjore e penale dhe policia do të kthehet në shinat e ligjshmërisë duke i shërbyer vetëm sigurisë së vendit dhe qytetarëve”, mbyll deklaratën ish-deputetja.