Gardianë të Burgut të Burrelit pohuan për tirananews.al se pasditen e sotme kanë mbërritur tri masa ndëshkimore, për tre zyrtarë të këtij institucioni. Shkaku i këtyre masave duket interesant. Thuhet se gjatë kontrollit të ushtruar nga specialistë të Drejtorisë së Përgjithshme të Burgjeve janë konstatuar dy kokrra vezë të prishura.
Burimet shtojnë se është firmosur largimi nga puna i shefit të llogjistikës pranë Burgut të Burrelit Ilir Merra dhe është dhënë vërejtje me shkrim për shefin e personelit Fari Dema dhe mjekun Dalip Gjoka. Shkresat zyrtare të DPB kanë mbërritur pas turnit të parë të punës. Sakaq Merra, Dema e Gjoka nuk janë njohur ende me vendimin e marrë.
Atëherë kur pritej marrja e masave për mungesën e energjisë në burg dhe protestën e disa të dënuarve vijnë masat ndëshkuese për cilësinë e ushqimeve, ndërkohë tenderi i tyre zhvillohet lart, në qendër. Nuk është plotësisht e qartë në se kjo ndodh për të larguar vëmendjen nga ngjarjet e fundit në këtë institucion.