Përfaqësuesja e Spanjës po përpiqet që të lërë pas krahëve dështimin e bujshëm në Botërorin 2018 dhe nën drejtimin e Luis Enrikes, pak nga pak po kthehet në rrugën e duhur për të synuar objektiva madhorë. Po e bën këtë me një përzierje shumë interesante veteranësh dhe të rinjsh, me dy emra përfaqësues të secilit grup që la shenjë në ndeshjen e sotme të fituar 4-0 ndaj Ukrainës.
Ansu Fati, titullar në sfidën e sotme, fitoi penalltinë më të shpejtë në historinë e përfaqësueses spanjolle, pas vetëm 87 sekondash lojë. Nga pika e bardhë shënoi Serxhio Ramos, i cili më pas realizoi edhe golin e dytë, duke u bërë golashënuesi i 7 më i mirë në historinë e përfaqësueses spanjolle, për të barazuar një legjendë si Di Stefano me 23 gola të realizuar me kombëtaren.
Pak minuta më vonë, Ansi Fati i shtoi edhe një tjetër rekord serisë mbresëlënëse që ka regjistruar që kur ka debutuar me profesionistët. Pasi u bë golashënuesi më i ri në historinë e Barcelonës në kampionat dhe më i riu në përgjithësi në Ligën e Kampioneve, futbollsti u bë sot në moshën 17 vjeç e 311 ditë lojtari më i ri që shënon me fanellën e Spanjës.