Sekretari i Përgjithshëm i Partisë Demokratike, Gazment Bardhi iu përgjigj deklaratës së zv/kryeministrit Erion Braçe mbi një formularë të shpërndarë për administratën për të kontribuar me vota për zgjedhjet parlamentare.
Bardhi thekson se shqiptarët i kanë parë ‘erionbraçet’ e PS në dosjen 184 dhe 339 duke shantazhuar administratën dhe mësuesit për të votuar PS.
Duke e konsideruar shkelje të ligjit presionin mbi administratën, Bardhi shprehet se duhet të nisë një hetim serioz për të zbuluar kupolën e PS, të përfshirë në shkelje.
Reagimi i plotë:
Erion Braçe të mos fyejë shqiptarët, se nuk i hanë më mashtrimet bajate! Ata i kanë parë erionbraçet e PS në dosjen 184 dhe 339 duke shantazhuar administratën dhe mësuesit për të votuar PS. Formulari është shpërndarë nga PS dhe këtë Erion Braçe e di shumë mirë. Po aq mirë e dinë punonjësit e ndershëm të administratës publike që sot ndjejnë mbi kurriz presionin e bandës në pushtet.
Presioni ndaj administratës për të favorizuar në zgjedhje partinë në pushtet, është vepër penale. Erjon Braçe dhe kushdo tjetër bën mirë ta mësojë këtë! PD është e vendosur të përballë këdo me ligjin për çdo shkelje.
Një hetim serioz, duhet të nisë që tani, për të zbuluar kupolën e PS, të përfshirë në shkelje ligji, jo vetëm me presionin ndaj administratës, por edhe për pazaret e dëshpëruara me bandat! Dhe meqë jemi tek pazaret me bandat: Erion Braçe bën mirë të flasë për firmën e tij në projektin e rikthimit të kumarit në rrugët dhe kullat qendrore të Tiranës.