Nënprefekti i Tropojës Granit Kurmekaj shprehet se këtë vit numri i turistëve të huaj ka qenë më i pakët në rrethin e Tropojës, për shkak të pandemisë, por ky vakum është kompensuar nga turistë të ardhur nga të gjitha trevat shqiptare, brenda dhe jashtë kufijëve shtetërorë.
“Ka qenë një vit ndryshe. Realisht ka patur një numër më të reduktuar të turistëve nga vendet e tjera. Shumë kompani turistike dhe individë janë detyruar të pezullojnë udhëtimet e tyre drejt Tropojës. Shkaku kryesor ishte Covid 19. Por, ndryshe nga vitet e kaluara ky vakum është plotësuar nga turistë të ardhur nga të gjitha trevat shqiptare. Një numër i madh turistësh kanë ardhur nga Kosova dhe Jugu i Shqipërisë”, nënvisoi Kurmekaj.
Ai shtoi se Tropoja është e magjishme dhe afron bukuri mahnitëse për vizitorët. Valbona, Nikaj Merturi, Lekbibaj, Bjeshkët e Tropojës dhe vise të tjera janë të rralla. Në fundjavë Tropoja është e mbipopulluar nga turistë vendas dhe të huaj, këto të fundit më të pakët në numër se sa vitet e kaluara.
Sipas nënprefektit Tropoja nuk është e bukur vetëm në stinën e verës, por në katër stinët e vitit. “Tropoja, thotë ai, është atraktive dhe joshëse në çdo stinë të vitit. Kam shoqëruar ditët e fundit turistë nga Korça, Peja, Vlora, Prizreni, Saranda, Ferizaj, Mati e treva të tjera dhe ato kur janë larguar janë shprehur shumë të kënaqur, madje kanë deklaruar se do të rikthehen përsëri në Tropojë.”
Kurmekaj nënvizoi se bizneset e zonave turistike kanë treguar bujarinë e tyre në lidhje me trajtimin e turistëve, duke patur çmime të pranueshme për hotelerinë dhe ushqimin. Duket se kanë sakrifikuar diçka për ta mbajtur gjallë turizmin në këto anë. Nënprefekti thotë se investimet e kryera nga qeveria në infrastrukturë kanë ndikuar pozitivisht në lëvizjen normale të turistëve dhe shtimin e tyre. /tirananews.al/
