Nëse nuk e lexuat të premten se Elena Pici zëvendësoi Pralent Ndrecën në postin e Sekretarit të Përgjithshëm në Ministrinë e Brendshme, me gjasë lexuat titujt e portaleve në ditët pasuese, të mbushura me fjalë që mund të jenë shumë gjëra, por jo profesionale.
Picit iu referuan si “kamarierja në klipin e Alban Skënderajt” që “kishte skena flirtimi me këngëtarin”. Me pak fjalë, “një vajzë videoklipesh që u bë sekretare në Ministrinë e Brendshme”. Të njëjtat portale, që nga mëngjesi në darkë i futen me zell hetimeve mbi arrestimin e Fjolla Morinës dhe nëse kishte a jo armë apo është apo jo shtatzënë, dështuan për të gërmuar në Google mbi CV-në e Picit, sepse nëse do të kishin minimumin e etikës profesionale, do të kishin kuptuar që eksperiencat e saj të punës janë shumë më tepër se thjesht “modele videoklipesh” (jo se ka ndonjë gjë të jesh modele nëpër klipe, por për një post në Ministrinë e Brendshme duhen disa eksperienca të tjera).