Tirana ditën e nesërme ka “takim me historinë”. Bardheblutë luajnë ndaj Jang Bojs (20:30) ndeshjen e Play-Off të Europa League, të cilën nëse e fitojnë, arrijnë në fazën e grupeve, që do ishte suksesi më i madh në historinë 100-vjeçare të klubit. Prej ditësh lojtarët kanë qenë të izoluar në një prej hoteleve të kryeqytetit dhe mëngjesin e sotëm e gjithë skuadra dhe stafi janë nisur drejt Zvicrës.
Lajmi i mirë ishte se ditën e djeshme ata rezultuan të gjithë negativë në testin për Covid-19 dhe tashmë janë më të lirshëm të mendojnë plotësisht për sfidën e nesërme. Siç e tha edhe vetë trajneri Egbo ditën e djeshme, skuadra nuk ka asnjë mungesë dhe Sasraku, Hoxhallari e Batha, të cilët nuk kanë qenë në gjendjen më të mirë fizike tashmë janë rikuperuar.
Klubi kampion i Shqipërisë mëgjesin e sotëm ka publikuar disa foto të skuadrës në aeroportin e Rinasit. Ashtu si në udhëtimin e mëparshëm në Gjeorgji, edhe në këtë rast ata janë asistuar nga linja ajrore shtetërore “Air Albania”, që ka rezervuar një fluturim “charter” posaçërisht për ta.