Policia e Tiranës bën të ditur se ka vënë në pranga një 32-vjeçar, teksa gjatë kontrollit në mjetin e tij iu gjet një sasi prej 4 kg kanabis sativa.
Policia bën të ditur se kishte informacion për personin në fjalë se merrej me shitjen e drogës dhe organizoi operacionin “Street” për arrestimin e tij.
NJOFTIMI I PLOTE
Tiranë
Vijojnë operacionet e njëpasnjëshme për parandalimin dhe goditjen e veprimtarisë kriminale në fushën e narkotikëve.
Finalizohet nga Seksioni për Hetimin e Narkotikëve në Drejtorinë Vendore të Policisë Tiranë, operacioni policor i koduar “Street”.
Vihet në pranga poseduesi dhe shpërndarësi i lëndës narkotike.
Sekuestrohen një sasi dozash me lëndë narkotike cannabis sativa, një shumë e konsiderueshme parash të përfituara nga kjo veprimtari kriminale, 1 automjet dhe 1 aparat celular.
Në vijim të goditjeve të njëpasnjëshme të veprimtarisë kriminale në fushën e narkotikëve, bazuar dhe në informacionet e marra në rrugë operative se një 32-vjeçar merrej me shitjen e lëndëve narkotike dhe lëvizte me mjet nga zona e Parkut në drejtim të rrugës “Muhamet Gjollesha”, Seksioni për Hetimin e Narkotikëve në DVP Tiranë zhvilloi operacionin antidrogë të koduar “Street”, në kuadër të të cilit u arrestua në flagrancë shtetasi:
A. B., 32 vjeç, banues në Tiranë, poseduesi i lëndës narkotike.
Gjatë kontrollit të ushtruar në mjetin me të cilin po qarkullonte ky shtetas, në rrugën “Muhamet Gjollesha”, shërbimet e Policisë kanë gjetur rreth 4 kg lëndë të dyshuar cannabis sativa, një shumë të konsiderueshme parash të dyshuara të përfituara nga shitja e lëndës narkotike dhe një aparat celular, që u sekuestruan në cilësinë e provës materiale së bashku me automjetin.
Materialet i kaluan Prokurorisë pranë Gjykatës së Shkallës së Parë Tiranë, në ngarkim të shtetasit A. B., për veprën penale “Prodhimi dhe shitja e narkotikëve”.