Janë mbyllur ndeshjet e orës 18:00 në UEFA Nations League, të vlefshme për raundin e tretë të fazës së grupeve. Në Ligën A, vëmendje më të madhe mori sfida mes Anglisë dhe Belgjikës, që u mbyll me shifrat 2-1.
Lukaku shënoi fillimisht me penallti, për të kaluar Belgjikën në avantazh. Rashford, po ashtu me 11-metërsh, barazoi për Anglinë. Në pjesën e dytë, Mount shënoi për anglezët dhe çoi shifrat në 2-1, duke vendosur dhe rezultatin final të sfidës.
Me të njëjtin rezultat, fitoi edhe Kroacia kundër Suedisë. Vlasic dhe Kramaric shënuan për nën-kampionët e botës, ndërsa Berg shënoi golin e vetëm suedez. Bosnje-Hercegovina dhe Holanda, u ndanë në barazim 0-0.
Në Ligën B, Finlanda mposhti pastër 2-0 skuadrën e Bullgarisë, ndërsa Norvegjia e Haaland shkatërroi me shifrat 4-0 skuadrën e Rumanisë. Në Ligën C, Gjeorgjia fitoi 1-2 në transfertë ndaj Armenisë, ndërsa dy sfidat tjera u ndanë në barazim: Estoni-Maqedoni e Veriut (3-3) dhe Lituani-Bjellorusi (2-2).