Gjykata e Apelit e Krimeve të Rënda në vendimin e dhënë një ditë më parë shpëtoi nga burgimi i përjetshëm Dritan Dajtin, autorin e vrasjes së katër policëve në 2009.
Kjo gjykatë pranoi gjykimin e shkurtuar duke e dënuar me 25 vite burg. Por burime nga organi i akuzës bëjnë të ditur se do të bëjë rekurs në Gjykatën e Lartë për vendimin e dhënë një ditë më parë.
Në gusht të 2009 katër oficerët e policisë ishin në një operacion për arrestimin e Dritan Dajtit. Fatos Xhani, Altin Dizdari, Kastriot Feskaj, dhe Sajmir Duçkollari, mbetën të vrarë kur efektivët e Njësisë Operacionale të Policisë së Shtetit, ndërhynë në zonën e plazhit për të arrestuar Dajtin i cili ishte në kërkim, pasi ai ishte dënuar për vrasjen e biznesmenit Agim Beqo, ngjarje e ndodhur në vitin 1999 në Tiranë.
Deri në momentin e arrestimit pak minuta pas masakrës ku mbeti edhe vetë i plagosur, Dritan Dajti kishte qenë në liri pas arratisë nga Gjykata e Tiranës në verë të vitit 2004.