Detaje të reja janë zbuluar nga zhdukja prej 4 ditësh e 39 vjeçarit Ermal Ngucaj nga Lepenica, në Vlorë. Burime bëjnë me dije se çështja e zhdukjes së 39 vjeçarit ka kaluar në SPAK.
Makina e tij u gjet e braktisur dhe mësohet se ajo ka qenë e mbyllur dhe nuk janë gjetur as çelësat. Brenda saj nuk kishte ndonjë send të dyshimtë, por vetëm atlete dhe rroba. Sipas informacioneve, 39-vjeçari kishte bërë 7 muaj burg për një konflikt në gurore në Lepenicë të Vlorës.
Po hetohet nëse ka pasur një konflikt, apo përfshirje në veprimtarinë kriminale të lëndëve narkotike, por nuk ka asnjë provë deri në këto momente. Policia po heton gjithashtu nëse Ermali mund të jetë zhdukur në një vend tjetër dhe makina është parkuar më pas në Mavrovë.
Ditën e djeshme prindërit e tij treguan se dyshojnë se mund ta kenë rrëmbyer dhe i bënë thirrje policisë për gjetjen e djalit të tij të vetëm, pasi më herët kanë përjetuar vdekjen e një djali tjetër dhe nuk mund ta përballonin edhe humbjen e Ermalit.