Nënprefekti i rrethit Matit, njëkohësisht kryetari i Partisë Socialiste të Bashkisë Mat, Hasan Pasha, botoi këto ditë librin: “Të pathënat e 30 viteve”.
Ish gazetari i disa mediave të shkruara dhe vizive ka publikuar gjatë tri dekadave shkrime në shumta për trevat e Matit, Dibrës e Bulqizës.
Me një gjuhë të qartë, si një dëshmitarë okularë i ngjarjeve, Pasha shkon përtej lajmeve të botuara ndër vite.
Hasan Pasha është ndër gazetarët e njohur në Qarkun e Dibrës. Për mëse 30 vjet firma e tij ka zënë vend në organe të rëndësishme të shtypit, së pari te “Zëri i Popullit”, pastaj në “Koha Jonë”, “Gazeta Shqiptare”, “Sport Ekspres”, “Mapo”, “Dita”, “Panorama”, “Korrieri”, “Panorama Sport”, “Mati”, “Kuvendi”, por dhe në mediat vizive “Mat Tv” e “Vizion plus”. Me modesti ai kujton sentencën e njohur se “ata që dinë të shkruajnë, nuk dinë të heshtin”.
Hamdi Hysuka, poeti dhe shkrimtari që ka shkruar parathënien e librit “Të pathënat e 30 viteve”, ndër të thotë: “Mjafton t’u referohemi të pathënave të Hasan Pashës nëpërmjet shkrimeve “Pellgje gjaku e dajak mbi opozitarët matjanë”, “Si e ‘gozhdova’ një ish-zyrtarë”, “Çmenduria e hapjes së depove ushtarake”, “Agallarët e Bulqizës”, “Hanet e Saliut apo spitale shtetrorë?”, “Vështrim mbi Matin e vitit 1997”, “Fushata elektorale e 18 shkurtit 2007”, “Rrëfimi i rrallë i Dull Katuçit” etj. Kur i përfundon së lexuari këto të pathëna, në mendje s’ka se si mos të të mbeten forma shfaqjeje të kronikës së zezë, dukuri të trishta të realitetit të sotëm, ngjarje të ndodhura dramatike e tragjike, vrasje, grabitje, krime, imoralitete.”