Një inxhinier miniere dhe dy minatorë kanë humbur çdo kontakt me të afërmit e tyre. Në orën 08.00 kanë nisur punën në minierën e kromit në Balgjaj dhe nuk dihet fati i tyre, pasi jo vetëm nuk kanë dalë nga galeria, por nuk ka asnjë lajm ku ndodhen, janë të izoluar apo ndonjë masiv i ka zënë poshtë. Policia lokale është njoftuar pas orës 18.00, kohë kur inxhinieri me inicialet I.H, 62 vjeç dhe dy minatorët nuk kanë dalë nga miniera.
Njoftimi i Policisë
Me datë 28.10.2020, rreth orës 18:15, shtetasi S. H., ka telefonuar Sallën Operative në Drejtorinë Vendore të Policisë Dibër, se vëllai i tij shtetasi I.H., rreth 62 vjeç me detyrë inxhinier miniere, së bashku me dy punëtorë, të cilët punonin në minierën “Balgjaj”, Selishtë, Dibër, kanë humbur kontaktet me familjen. Shërbimet e Policisë dhe grupi hetimor kanë shkuar menjëherë në vendngjarje, dhe nga veprimet paraprake të kryera dyshohet se personat mund të kenë mbetur të izoluar brenda në galeri, pasi sendet personale, rrobat dhe telefonat, ndodhen në dhomën e ndërrimit. Janë njoftuar grupet e avari shpëtimit në miniera, për të bërë të mundur lokalizimin dhe gjetjen e tre shtetasve.