Kryetari i PS Tiranë dhe njëherësh edhe deputeti i njësise nr 8, Ervin Bushati, zhvilloi një bashkëbisedim me nxënës, prindër dhe stafin pedagogjik të shkollës “Misto Mame” lidhur me procesin mësimor gjatë kësaj periudhe pandemie.
“Prej muajsh tashmë jo vetëm Shqiperia, por mbarë globi gjendet nën kthetrat e Covid 19, por që falë masave të marra në kohë nga qeveria shqiptare kemi arritur ta menaxhojmë atë. Për ne si politikbërës, qytetarët dhe shëndeti juaj janë primare ndaj dhe e gjithë vëmendja e qeverisë është e fokusuar tek ju dhe fëmijët tuaj“, tha Bushati.
Bushati kërkoi mirëkuptimin dhe bashkëpunim e nxënësve por edhe të stafit pedagogjik dhe të komunitetit të prindërve për respektimin me rigorozitet të protokolleve të miratuara nga ana e Ministrisë së Shëndetësisë. “Jemi në një kohë të vështirë, ndaj dhe sot gjendem këtu për të kërkuar bashkëpunimin e secilit prej jush, drejtues, mësues, prind, psikolog dhe nxënës. Më duhet të theksoj edhe njëherë se në këtë situatë të vështirë është e rëndësishme që të respektojmë rigorozisht masat dhe protokollet e miratuara nga MSH për të superuar këto ditë të vështira që po kalojmë . Është shumë i rëndësishem bashkëpunimi dhe komunikimi. Ne jemi ketu për ju ndaj dhe mos hezitoni për asnjë moment të na adresoni çdo problematike, në menyrë që të mos cenohet edhe cilësia e dijes në shkolla”, u shpreh Bushati.
Të pranishëm në këtë takim ishin mësues, nxënës, prindër të shkollës të cilët biseduan dhe dakordësuan rëndësinë e respektimit të protokolleve, si një masë parandaluese për të frenuar përhapjen e Covid-19.