Ky që shihni në foto është viktimë e një aksidenti tragjik me motor. I riu me origjinë shqiptar, Agron Dajlanaj banues në Prato të Italisë, po kthehej nga puna në mbrëmje kur u përfshi në një aksident fatal ndërsa po udhëtonte me skuterin e tij përgjatë rrugës Perfetti Ricasoli.
Ai punonte në një magazinë në zonë. Mediat lokale shkruajnë se aksidenti tragjik tronditi të gjithë komunitetin shqiptar por edhe shumë njerëz nga Prato që e njihnin atë si një të ri serioz kushtuar punës dhe familjes.
“Është me të vërtetë një humbje e madhe” – shpjegon presidenti i shoqatës shqiptare Sopoti , Qamil Zejnati – Agroni ishte një djalë italo-shqiptar dhe kishte punuar që kur ishte 18 vjeç si punëtor depoje në kooperativat në Campi. Ai e dinte atë rrugë shumë mirë dhe ne nuk mund ta kuptojmë se çfarë mund të ketë ndodhur. Si shoqatë ne menjëherë u lidhëm me familjen dhe mbi të gjitha me gruan që është 27 vjeç dhe me fëmijën. Shkova në shtëpinë e prindërve të tij, ai ishte një fëmijë i vetëm, si komunitet do të jetë detyra jonë të ndihmojmë familjen në një moment kaq delikat”.
Ai që e njihte më mirë ishte Lorenzo Zejnati, kandidat i PD për këshillin rajonal në zgjedhjet e fundit. “Ne jemi rritur së bashku dhe ai ishte një djalë unik – thotë Zejnati – një punëtor i palodhur dhe me një zemër të pabesueshme sidomos që kur lindi foshnja. Sapo mbaronte punën, kthehej në shtëpi sepse dëshironte ta shihte foshnjën duke u rritur. Është me të vërtetë një fakt i pabesueshëm”.
Agron Dajlanaj vdiq menjëherë pas dëmtimeve shumë të rënda të pësuara nga përplasja me një makinë që i parapriu atij në korsi, duke vazhduar nga Firence drejt Pratos. Përplasja shkaktoi aksidente zinxhir në rrugë për shkak se aksi ngushtohet në atë pjesë, duke lënë pas disa të plagosur me pasoja jo serioze për jetën.