Mjekja shqiptare Rubena Maçi, e cila punon në Torino të Italisë, tha se numri i të infektuarve po rritet çdo ditë, por nuk janë si në valën e parë.
Ajo foli në “Wake Up” për masat kufizuese që kanë nisur nga sot e që do zgjasin deri në datën 3 dhjetor. Autoritetet kanë thënë se masat kufizuese janë paksa më të lehta, dhe që do të ndryshojnë në varësi të situatës epidemiologjike.
Sërish e gjithë Italia, sipas dekretit që ka firmosur Giuseppe Conte, do të ndahet në tre zona: Zona e kuqe (me rrezik të lartë), portokalli (me rrezik të ndërmjetëm) dhe jeshile (zonë më e sigurt). Ajo tha se pavarësisht situatës kritike që po përjeton Italia, në fakt janë më mirë se Franca dhe Spanja.
“Për fat të mirë, në valën e dytë nuk gjendemi ndër shtetet me të infektuar, sepse po të shohim përditësimin e statistikave në dy javët e fundit, ku rastet në Europë kanë arritur nga 5 milionë në 10 milionë.
Franca, Spanja vazhdojnë të jenë më keq se Italia, për sa i përket numrit të të infektuarve. Në Itali janë 31 mijë të vdekur deri tani.
Për fat të mirë nuk jemi si në valën e parë, pasi në valën e parë ishim në një situatë dramatike. Nga mars-prilli kanë kaluar pothuajse 7 muaj, patëm një pauzë gjatë muajve korrik-gusht dhe në shtator-tetor filloi rritja e numrave. Tani është piku i rritjes së shifrave”, bëri të ditur mjekja.