Kryetari i Partisë Demokratike, Lulzim Basha e ka mohuar se ka pasur një kasetë për masakrën e Krushës së Madhe.
Basha ka deklaruar se as nuk e njeh personin që thuhet se paska bërë xhirime.
“Unë nuk e njoh këtë person që thotë se unë paskam pasur kasetë për masakrën e Krushës së Madhe dhe e fshinkam. Pse duhet ta fsheh këtë material kur janë publikuar momente nga Masakra e Krushës së Madhe.
Këtu ka një dorë që fabrikon të dhënat. Kjo është përpjekje e ulët për të hequr vëmendjen nga skandalet e kësaj qeverie. Ditën që Thaçi e Krasniqi ishin në Hagë, Rama ishte me Vuçiç. Më shqetëson sjellja e kryeministrit të Shqipërisë ndaj Kosovës”, deklaroi Basha.
Ndërsa në një intervistë për Top Channel, Selami Hoti i cili ka humbur babanë në këtë masakër.
Hoti u shpreh se ka një video që është bërë nga Milaim Vellanica, në atë kohë atë dëshmi ia ka dërguar Lulzim Basha.
“Një nga provat më të forta janë këto varre këtu që i kemi, është një video regjistrim që është bërë nga zoti Milaim Vellanica, në atë kohë atë dëshmi ia ka dërguar zoti Lulzim Basha. Andaj në këtë rast do të shfrytëzoja rastin publikisht për t’i kërkuar jo vetëm zotit Basha nëse din apo e ka atë material, këtë e bëj publik”, u shpreh Hoti për Top Channel.