Grupi i famshëm koreano-jugor BTS ka publikuar albumin e dytë, i cili deri tani ka marrë vlerësime shumë të mira. 7 djemtë mbajtën një konferencë në mënyrë virtuale ku u shprehën se ky album vjen si një mesazh shprese për të gjithë njerëzit në botë të cilët po vuajnë me Covid-19.
I quajtur “BE”, në të përfshihet edhe kënga e tyre Dynamite e cila aktualisht renditet në krye të klasifikimeve muzikore si ndër më të mirat e momentit.
The Guardian shkruan se ajo që e bën BTS revolucionare, është ambicia e tyre për të sjellë të veçantën në tregun ndërkombëtar. Ekspertët e muzikës e kanë cilësuar grupin BTS si ndër më të rrallët të cilët ndërthurin shumë bukur muzikën pop dhe atë tekno.
Grupi që përbëhet nga këngëtarët J-Hope, RM, Suga, Jungkook, V, Jin, Jimin. Që nga debutimi në 2013, BTS është shndërruar në grupin muzikor më të pëlqyer, duke sjellë ritme edhe tekste shumë të veçanta, si dhe aktivitete që kanë realizuar ku në qendër kanë qenë të rinjtë. Pandemia e Covid-19 i anuloi atyre edhe turin që do të bënin në disa vende të botës.
Kujtojmë se ata muajin e kaluar mbajtën koncertin e parë online. Gjatë performancës ekranet e vogla të vendosura në prapaskenë shfaqnin pamjet e miliona fansave nga çdo cep i botës.