Nëntori është shoqëruar me temperatura të larta dhe reshje të pakta shiu, por si do të jetë java e fundit e tij.
Meteorologët thonë se vlerat termike pritet të kenë një rritje graduale dhe deri të premten do të ketë kthjellime.
“Për vlerat termike pritet një rritje graduale e tyre pasi gjatë fundjavës që kaluam patëm vlera minimale me minus 3 apo 4 gradë. Ndërsa në ditët në vijim pritet përmirësim i tyre duke bërë që në pjesën më të madhe të territorit të kalojë në vlera pozitive.
Po ashtu një rritje graduale dhe e lehtë do kenë edhe vlerat maksimale, ku pritet që në ultësirën perëndimore vlerat maksimale të shkojnë jo më shumë se 19 gradë celsius.
Për sa i përket kushteve atmosferike, pritet që deri të premten kthjellimet të jenë mbizotëruese, herë pas here me prezencë të vranësirave dujke krijuar mundësi të pakta për reshje shiu, por me reshje të izoluara.
Ndërsa fundjava që përkon dhe me festat e Nëntorit pritet të ketë fuqizim të vranësirave duke bërë që këto vranësira të gjenerojnë reshje shiu në territorin shqiptar”, thotë meteorologu Hakil Osmani.
Përsa i përket reshjeve të borës, ai thotë se pavarësisht se kanë nisur në Korçë është ende herët.