Është momenti i Emanuele Ndojit dhe Brescia-s së tij në Serinë B italiane, aty ku gara për një vend në Serinë A është më e ndezur se kurrë dhe ku çdo javë ka përballje mes rivalësh direktë e surpriza të mëdha.
Nuk është më surprizë Ndoj, sepse mesfushori i kombëtares shqiptare është kthyer në element kyç te Brescia, që nuk humbet prej 10 ndeshjesh dhe tashmë ka marrë kreun e kampionatit, duke habitur të gjithë, sepse e nisi sezonin me synime më modeste.
Gazzetta dello Sport ka organizuar një sondazh ku tifozët e Serisë B kanë votuar për 5 lojtarët më të mirë të javës, nga një për çdo kategori: Karizmë, Zemër, Energji, Gjenialitet dhe Koha-Shtesë.
Në kategorinë Energji ka triumfuar Ndoj, me 22-vjeçarin që fundjavën e shkuar ishte perfekt, duke fituar penalltinë për golin e parë shënuar nga Donnarumma dhe duke shënuar më pas golin e fitores 2-1.
Nëse në Itali çmenden për 18-vjeçarin Tonali, i cili krahasohet me Pirlon dhe është që tani pjesë e kombëtares italiane, në Shqipëri duhet pak më shumë respekt për Ndoj, i cili këtë sezon ka qenë një ndër më të mirët te Brescia dhe nuk është më një fëmijë pa eksperiencë.