Seancat parlamentare do të rinisin pas ndërprerjes për shkak të masave të vendosura për parandalimin e përhapjes së virusit ku nuk lejohet grumbullimi më shumë se 10 persona.
Në Konferencën e Kryetarëve kreu i Kuvendit Gramoz Ruçi bëri të ditur se Komiteti Teknik i Ekspertëve dhe Ministria e Shëndetësisë pas kërkesës së tij më 18 nëntor 2020, kanë konfirmuar se “Urdhëri nr. 633, datë 11.11.2020, “Për ndalimin e grumbullimeve në vende të mbyllura apo të hapura”, nuk cënon aktivitetin e Kuvendit për zhvillimin e seancave plenare. Seancat plenare duhet të zhvillohen duke ruajtur rregullat e distancimit social dhe mundësisht të kenë kufizime në kohëzgjatje.” Në këto rrethana, kohëzgjatja e seancave do të shkurtohet në tre orë.
Konferenca vendosi zhvillimin e seancave plenare me datat 3, 10 dhe 17 dhjetor 2020.
Ndërkohë bëhet e ditur se kërkesa e Ballës dhe një grupi deputetësh për raportine Dick Marty do kalojë në seancë plenare.
“Konferenca vendosi t’i përcjellë seancës plenare kërkesën e një grupi deputetësh për ngritjen e një Komisioni të Posaçëm të Kuvendit për administrimin e dokumentacionit dhe hartimin e një raporti mbi gjetjet dhe konkluzionet e verifikimeve të kryera nga institucionet përkatëse në Shqipëri mbi çështjet e raportit të anëtarit të APKiE Dick Marty mbi rolin e përfaqësuesve politikë dhe institucioneve publike shqiptare në ndihmë të të ashtuquajturës veprimtari kriminale e drejtuesve të UÇK-së në territorin e Republikës së Shqipërisë”, thuhet në njoftimin e Parlamentit.