Katër persona janë arrestuar nga policia e Tiranës për vepra penale të ndryshme.
Një sherr mes të rinjve ka degjeneruar në përdorimin e dhunës me sende të forta. Ngjarja ka ndodhur në rrugën “Qamil Guranjaku” teksa ata janë vënë në pranga.
“Specialistët për Hetimin e Krimit në Komisariatin Nr.1, bënë arrestimin në flagrancë të shtetasve T.K., 25 vjeç dhe A.R., 27 vjeç, pasi në rrugën “Qamil Guranjaku”, gjatë një konflikti, kanë goditur njëri-tjetrin me sende të forta”, thotë policia.
Ndërkaq, nga specialistët për Hetimin e Krimit në Komisariatin e Policisë Nr.3, u bë arrestimi në flagrancë i shtetasit B.K., 32 vjeç, pasi ka shkelur vendimin e Gjykatës e cila e kishte pajisur me urdhër të menjëhershëm mbrojtje dhe ka ushtruar dhunë psikologjike ndaj nënës së tij.
Ndërsa policia rrugore bëri arrestimin në flagrancë të shtetasit F.M., 44 vjeç, pasi u kap në flagrancë duke drejtuar mjetin në gjendje të dehur në masën 1.01 mg/l.