Zëvendës drejtori i Përgjithshëm i Policisë, Albert Dervishaj deklaroi se të gjithë efektivët e repartit të “Shqiponjave” do të ritrajnohen më shpesh në përdorimin e armëve të zjarrit, duke nënkuptuar këtu qitjen dhe zbatimin e rregullave të sigurisë teknike.
I ftuar në “Repolitix”, Dervishaj tha se pas vrasjes së Klodian Rashës është vënë nën hetim i gjithë zinxhiri komandues dhe se pritet të ketë përjashtime e procedime.
“Drejtoria e standardeve profesionale është vënë në lëvizje, ka filluar hetimin administrativ dhe janë listuar të gjithë zinxhiri komandues në këtë hetim administrativ i shqiponjave, është në hetim administrativ. Janë bërë disa analiza tek reparti Shqiponjat dhe të gjithë Shqiponjat e Shqipërisë që ditën e ngjarjes dhe të evidentohen problematikat edhe më të vogla dhe të përpiqemi të kurojmë çdo lloj defekti që mund të konstatojmë në këto moment. Kemi marrë masa për të bërë një ritrajnim të shpejtë të gjithë shqiponjave për përdorimin e armëve të zjarrit, për zbatimin e rregullave të sigurisë teknik dhe kushdo që do jetë përgjegjësi do të merren procedime disiplinore deri në përjashtim nga forcat e rendit,”- tha Dervishaj.