Kroacia është në panik total si pasojë e tërmetit të fuqishëm me magnitudë 6.2 ballë që goditi vendin mesditën e sotme në orën 12.17. Epiqendra e tërmetit ishte 3 kilometra nga qyteti Petrina, ndërsa lëkundjet u ndjenë në të gjithë Kroacinë.
Ndërkohë, mediat raportojnë se si pasojë e lëkundjeve, një fëmijë ka humbur jetën. Lajmin për të miturin e konfirmoi edhe kryetari i Petrinjas, Darinko Dumbović për mediat. Nga grupet e xhirimeve që ndodhen në vendngjarje mund të dëgjohen britmat e njerëzve, ndërsa raportohet se dëmet materiale janë të shumta.
Tërmeti ishte aq i fortë sa u ndje edhe në Dubrovnik. Dëmet nga tërmeti janë të shumta, ndërsa raportohet për disa të lënduar.
Ndërsa një pjesë e Kroacisë ka mbetur pa energji elektrike. Ndërkohë, policia u ka bërë thirrje qytetarëve që të largohen nga ndërtesat. Nga raportimet e para, thuhet se si pasojë e lëkundjeve, gjysma e qytetit ka mbetur e shkatërruar.
